'n Dak oor jou kop.

Daar is so baie dinge waaroor 'n mens kan skryf in die groot en, op so baie plekke, mooi ou wêreld van ons. Maar ek het besluit dat ek net ietsie korts met julle wou deel oor die land waarin ons woon.

Daar is 'n spesifieke huis waaroor ons altyd vlieg wanneer ons opleiding doen hier in Al Ain. Die huis is net so buite die dorp en ek kan my altyd verkyk aan die plek. Want in 'n sekere sin het die huis 'n unieke bekoring aan hom. Iets wat ek nog nie vantevore gesien het aan 'n huis se ontwerp nie.

As ons dink aan 'n huis dan sien ons mos dadelik die prentjie van die voorkant van 'n huis met sy voordeur en 'n venstertjie. Baie keer dan skets ons sommer 'n paadjie wat so na die voordeur toe loop. Van ons kunstiges sal dan sommer 'n buite kraan byvoeg wat 'n druppel het wat nog aan die kraan se tuit hang. Dan sal ander weer 'n boom aan die kant van die huis bysit met heuwels aan die agterkant, ag en so kan ek aangaan om te vertel dat party gras polle sal teken....maar julle kry die idee? Ietsie sommer plain en simple. Niks fancy nie. Soos hierdie prentjie.

Maar dit lyk my vir ander is 'n gewone huis nie genoeg nie en hulle soek iets unieks. En daarom wou ek met julle hierdie huis deel. Nie net is hy uniek nie maar hy staan alleen so op 'n effense hoogtetjie gebou, in die woestyn. Ek sou graag wou sien hoe lyk so plek binne, en kan maar net myself indink, as die ontwerp so uniek is? Hoeveel male het ek nie gesmag na die lekker blou van die swembad as ons so in die hitte gevlieg het nie, want ons helikopter het mos nie Aircon nie. Die foto se kwaliteit is maar selfoon kamera kwaliteit, maar ek dink julle sal die uitleg verstaan.

Die huis is in drie dele gebou en ek neem aan almal kom maar in die middel byeen. Die swembad loop regonderdeur die een vleuel. Aan die regterkant van die foto is daar 'n dam met 'n buitehuisie/ Lapa in die middel van die dam. Voor die gras geplant was het dit dor gelyk, maar nou is dit mooi. Ek dink as die tuin eers gevestig is gaan dit 'n lushof wees. Mense en hulle idees...dit net vir 'n dak oor hulle koppe?